2015 ~ m

الاثنين، 29 يونيو 2015

لوك جديد لشعري تجربتي مع الصبغة الطبيعية ..

السلام عليكم ورحمة الله وبركاته

كثير طلبوني اكتب عن تجربتي مع الصبغة الطبيعية اللي صبغتها وحطيت لكم النتيجة بسناب , قبل لا ابدا بمكونات الصبغة وغيره اعرفي ان شعر عن شعر يختلف ف النتيجة اللي طلعت معي ممكن ما تطلع معك و كذلك اللي تحط حنة لشعرها ممكن تصبغ معاك لكن بشكل بسيط وممكن ما تشوفين أي تغير وانا ما انصح اللي تحط حنة تجرب الصبغة الا لو كانت اخر مرا حنيتي قبل فترة لا تقل عن ثلاث شهور.

ايش هي الصبغة؟
الاغلب يسميها صبغة النسكافية الطبيعية و قديمة جدا وفي كثير تجارب لها بقوقل شوفيها لو حبيتي معلومات اكثر, تعتبر صبغة طبيعية لان مكوناتها طبيعية باستثناء الاكسجين ولان في اشياء طبيعية تغطي عليه ولا ياثر على الشعر.

تجربتي الشخصية ♥!!
شعري محب لقلبي واللي يعرفني يعرف وش كثر انا احبه واهتمامي فيه مكثف , طبيعة شعري ناعم ولونه اسود غامق , ما قد لي فكرت اصبغ ابدا وحتى يوم فكرت كنت خايفة لان الكثير يقول تسبب ضرر و تعدم الشعر الخ , وبعد تفكير قررت على البني كتغير لنفسيتي , وحده من صحباتي جربتها وعجبني اللون وحبيتها لان مكوناتها طبيعية.

الاسئلة المكررة!
هل ضررت لك شعرك؟
لا ابد الحمدلله وللأمانة لاحظت بالبداية نفشه بسيطة لكن مع الاهتمام والزيوت راحت

كم ساعة جلستي بصبغه؟
يمكن ست ساعات او اكثر لان انا شعري غامق فخفت اتركها كم ساعة بس ولا تصبغ

ندمتي انك صبغتيها؟
لا ابد لان ما سببت لي أي ضرر

كثفتي عنايتك بعدها؟

عنايتي من قبلها مكثفة لكن نصيحة الشعر المصبوغ يحتاج عناية ضروري الاهتمام زيوت ماسكات الخ خصصي يوم او يومين بالأسبوع لشعرك واحرصي على البلسم وحمام الزيت.

مكونات الصبغة!
علبة اكسجين ويلا رقم 9 لو كان شعرك قصير , علبتين لو شعرك طويل
بمقدار بيالة الشاي زيت زيتون
بيضة
ملعقة كركم
ثلاث م ع نسكافية

ملاحظة :
كل ما زاد الكركم النتيجة لون افتح على عسلي وكل ما زاد النسكافية لون اغمق على بني.

الاثنين، 8 يونيو 2015

الاهتمام الكامل بالبشرة + نصائح .

السلام عليكم ورحمة الله وبركاته

موضوع اليوم انطلب مني بشكل كبير على اني قد تطرقت لكل مشاكل البشرة وحلول لها حبيت اجمعها كاملة في تدوينه:

كيف تعرفين نوع بشرتك:

مهم جدا تحددين نوع بشرتك لان من خلاله اختيارك للمنتجات يكون صح وحاليا كل الشركات صارت تحدد منتجاتها لكل انواع البشرات المختلفة.

انواع البشرة: جافة , عادية, دهنية , مختلطة , عشان تحددين نوع بشرتك في طريقة تعتبر اسهل من غيرها وللامانة هي من موقع جمالك , اغسلي بشرتك بالماء ونشفيه وبعد ساعة كاملة من دون ما تحطين أي شي على وجهك جيبي مناديل (كلينكس) واضغطي على الجبهة والخدين والانف عندك اربع احتمالات:

- لو شفتي بالأربع اماكن اللي ضغطتي عليها دهون يعني بشرتك دهنية.
- لو شفتي ببعض الاماكن مب كلها دهون وقشور يعني بشرتك مختلطة.
- لو ما لاحظتي أي اثار دهون معناه بشرتك عادية.
- لو شفتي قشور معناه بشرتك جافة.

والحين كل وحده تحدد نوع بشرتها , نرجع لمحور حديثنا اللي هو الاهتمام لكل نوع بشرة اهتمام خاص فيها مثلا البشرة الجافة تحتاج ترطيب و سوائل , ضروري يكون لبشرتك روتين يومي من غسول و تونر و مرطب , لكل منهم اهمية ما تقل عن الاخر

الغسول: مره مهم لان يزيل الجراثيم والبكتريا اللي تتراكم طول اليوم كثير بنات تقول لك انا بشرتي كويسة ما احتاج بالعكس في اشياء تكون تحت الجلد متراكمة ما تشوفها عينك لكل نوع بشرة غسول خاص اختاري اللي يناسب نوع بشرتك وعادي لو استخدمتي غسول وما ناسب بشرتك جربي لحد ما ترتاح بشرتك على نوع طبعا لا تحكمين من اول استخدام بالكثير اسبوع وبتعرفي يناسب او لا , افركيه بحركات دائرية , البشرة الجافة اكتفي بالاستخدام مرا باليوم و الدهنية مرتين.

التونر: خطوة مهمة للاسف كثير بنات يهملوها التونر يعتبر قابض للمسام ولو تركتي مسامك مفتوح بعد التنظيف او التقشير ترجع الاوساخ تتراكم فيه ويتوسع ويكون شكله واضح , استخدام التونر يكون بعد التنظيف او ازالة الميك اب , في كثير انواع اختاري اللي يناسبك , مب ضروري كل تونر يناسبك , ممكن تستخدمي تونر يكون تركيزه عالي وقوي على بشرتك ويسبب لكل تهيج امر طبيعي اللي يناسبك ممكن ما يناسب غيرك والعكس صحيح , والنقطة الاهم يكون التونر حقك خالي من أي نسبة كحول.

المرطب: الترطيب ثم الترطيب خطوة جدا مهمة والبشرة تحتاج ترطيب بشكل يومي انا افضل المرطب الطبي ويكون خالي من العطور او الكحول مثل مرطب سيتافيل.

نصائح لبشرة اجمل:

-استمري على روتين تنظيف البشرة بشكل يومي.
-استخدمي واقي من الشمس يحمي بشرتك.
-نظفي الفرش حقت الميك اب وعقميها باستمرار لان تراكم الجراثيم عليها يسبب لك حبوب.
-غيري الشراشف وغطاء المخدة كل اسبوع.
-مشاكل البشرة كثيرة لو كنتي تعانين من مشكلة روحي لطبيبة او استشارية تساعدك.
-ابدا لا تنامي وعلى وجهك ميك اب و ضروري تنظيف البشرة بعد المزيل والافضل استخدمي جهاز تنظيف.
-خصصي يومين بالأسبوع عناية لبشرتك مثل تقشير و ماسك.
-البخار فوائدة بتكلم فيها في تدوينة مفيد للبشرة استخدميه مرا كل شهر.
-الماء مهم وسر لنظارة البشرة حاولي تشربي على الاقل 8 كاسات في اليوم.

انتهى , اتمنى يكون الموضوع مفيد احبكم♥

عودة جديدة بكل حماس

السلام عليكم ورحمة الله وبركاته

بداية جديدة في مدونة جديدة اتمنى ان مواضيعي المتواضعة و البسيطة تنال اعجابكم بالبداية حابة اعرفكم على نفسي اسمي معالي او بما يسميني البعض الميث , طالبة و عمري ما تعدى العشرين سنة الكثير يحكي لي تفكيرك واسلوبك يسبق عمرك وهشي يسعدني لان دليل على التفكير السليم , بداية مشواري كانت نوفمبر 2014 في الانستغرام ابتديت بصفحة بسيطة تخص كل ما يتعلق بالأنثى و الحمدلله اثبت نفسي وربي رزقني بأجمل متابعات وبعيد كل البعد عن الرسمية كنت لهم اخت وصديقة , بعد تفكير وتخطيط افتتحت مدونتي , انا بنت بسيطة مثلي مثلكم اكتسبت معلومات من خلال تجاربي وحبيت افيدكم فيها , احترم النقد البناء والنصيحة الجميلة واتقبلها بكل حب واحترام ولا تنسون ان ابن ادم خطاء انا مب ملاك ولو شفتي مني خطاء انصحيني و وجهيني لعل تكوني افهم , قبل لا ابدء بطرح المواضيع اعرفي اني مب طبيبة او استشارية عشان يكون عندي حلول لمشكلتك و اتمنى اني اقدر اساعدك لو بشي بسيط , واللي يناسبني ممكن ما يناسبك والعكس صحيح , احبكم والله يجعلكم شاهدين لي لا علي.

حبيت ابدء بمواضيعي بموضوع معنوي لانها الاهم بالنسبة لي ولعل يكون كلام قديم قد قراءتيه من كتاباتي:

كل بنت تحب نفسها تكون اجمل بنت وطبع الانثى محبة للجمال ما في بنت قبيحة في بنت تعرف لنفسها فتجملها وبنت ما تعرف لنفسها فتشوها وكل وحده فينا جميلة بشي معين عشان كذا لا تقولين انا قبيحة شينه الكلمات هاذي ابعديها عن قاموس حياتك ضيفي لقاموسك انا جميلة اذا اهتميت بنفسي انا جميلة اذا عرفت كيف ابرز ملامحي , وحده من متابعاتي كتبت لي كيف اهتم بنفسي من الالف لي الياء؟ وان شاءالله بتطلعين من البوست هذا وانتي تعرفين لنفسك

بالبداية جميلاتي اذا ربي رازقك بجمال لا تتكبرين على غيرك بعدي عن الغرور والتكبر لان بكرا كلنا تحت نفس التراب ترابك ما بيكون مرصع بالاماس عشانك كنتي الاجمل دنيا وبتخلص لكن ايش انتي سويتي فيها بيكون معاك ابتسمي الابتسامة صدقة كل اللي بوصله لك من الحكي الجمال جمال الروح وجمال الاخلاق والتعامل و الاسلوب , جمال وجهك مب وسيلة لدخولك لقلوب الناس , بأسلوبك وتعاملك تمتلكين قلوبهم , للأسف ان العقول الصغيرة في مجتمعنا تحدد مواصفات للجمال مثلا البنت البيضاء اجمل من السمراء طيب مين اللي قال؟ هل في دراسة اثبتت؟ , جمال يختلف عن جمال , لسمراء ملامحها اللي تميزها ممكن تكون ملامحها ما يناسبها البياض , لو بتكلم عن المواصفات حقت العقول الصغيرة ما بخلص فالاهم ركزي على نفسك كيف؟

-حطي هدفك من اهتمامك هو انك ترضين نفسك ثم لا شي لو رحتى لحفلة حطي ميك اب لنفسك صلحي شعرك لنفسك (ولنفسك عليك حق) لو كان هدفك ارضاء غيرك في مثل يقول رضاء الناس غايه لا تدرك بتشوفين شخص يمدحك وغيره يذمك خلي كل اهدافك تكون لنفسك

-الثقة ثم الثقة اكثر حاجة ضروري تكون عندك لا تتركين اي شخص يأثر عليك لو بكلمة خليك مثل الجبل واقف ما يهزه حد طوري من نفسك من شخصيتك , اسلوبكم , حبي نفسك وتقبليها , اتمنى انها تكون بداية لطيفة