الاهتمام الكامل بالبشرة + نصائح .

السلام عليكم ورحمة الله وبركاته


موضوع اليوم انطلب مني بشكل كبير على اني قد تطرقت لكل مشاكل البشرة وحلول لها حبيت اجمعها كاملة في تدوينه:


كيف تعرفين نوع بشرتك:

مهم جدا تحددين نوع بشرتك لان من خلاله اختيارك للمنتجات يكون صح وحاليا كل الشركات صارت تحدد منتجاتها لكل انواع البشرات المختلفة.

انواع البشرة: جافة , عادية, دهنية , مختلطة , عشان تحددين نوع بشرتك في طريقة تعتبر اسهل من غيرها وللامانة هي من موقع جمالك , اغسلي بشرتك بالماء ونشفيه وبعد ساعة كاملة من دون ما تحطين أي شي على وجهك جيبي مناديل (كلينكس) واضغطي على الجبهة والخدين والانف عندك اربع احتمالات:

- لو شفتي بالأربع اماكن اللي ضغطتي عليها دهون يعني بشرتك دهنية.
- لو شفتي ببعض الاماكن مب كلها  دهون وقشور يعني بشرتك مختلطة.
- لو ما لاحظتي أي اثار دهون معناه بشرتك عادية.
- لو شفتي قشور معناه بشرتك جافة.

والحين كل وحده تحدد نوع بشرتها , نرجع لمحور حديثنا اللي هو الاهتمام لكل نوع بشرة اهتمام خاص فيها مثلا البشرة الجافة تحتاج ترطيب و سوائل , ضروري يكون لبشرتك روتين يومي من غسول و تونر و مرطب , لكل منهم اهمية ما تقل عن الاخر

الغسول:  مره مهم لان يزيل الجراثيم والبكتريا اللي تتراكم طول اليوم كثير بنات تقول لك انا بشرتي كويسة ما احتاج بالعكس في اشياء تكون تحت الجلد متراكمة ما تشوفها عينك لكل نوع بشرة غسول خاص اختاري اللي يناسب نوع بشرتك وعادي لو استخدمتي غسول وما ناسب بشرتك جربي لحد ما ترتاح بشرتك على نوع طبعا لا تحكمين من اول استخدام بالكثير اسبوع وبتعرفي يناسب او لا , افركيه بحركات دائرية , البشرة الجافة اكتفي بالاستخدام مرا باليوم و الدهنية مرتين.

التونر: خطوة مهمة للاسف كثير بنات يهملوها التونر يعتبر قابض للمسام ولو تركتي مسامك مفتوح بعد التنظيف او التقشير ترجع الاوساخ تتراكم فيه ويتوسع ويكون شكله واضح , استخدام التونر يكون بعد التنظيف او ازالة الميك اب , في كثير انواع اختاري اللي يناسبك , مب ضروري كل تونر يناسبك , ممكن تستخدمي تونر يكون تركيزه عالي وقوي على بشرتك ويسبب لكل تهيج امر طبيعي اللي يناسبك ممكن ما يناسب غيرك والعكس صحيح , والنقطة الاهم يكون التونر حقك خالي من أي نسبة كحول.

المرطب: الترطيب ثم الترطيب خطوة جدا مهمة والبشرة تحتاج ترطيب بشكل يومي انا افضل المرطب الطبي ويكون خالي من العطور او الكحول مثل مرطب سيتافيل.



نصائح لبشرة اجمل:

-استمري على روتين تنظيف البشرة بشكل يومي.
-استخدمي واقي من الشمس يحمي بشرتك.
-نظفي الفرش حقت الميك اب وعقميها باستمرار لان تراكم الجراثيم عليها يسبب لك حبوب.
-غيري الشراشف وغطاء المخدة كل اسبوع.
-مشاكل البشرة كثيرة لو كنتي تعانين من مشكلة روحي لطبيبة او استشارية تساعدك.
-ابدا لا تنامي وعلى وجهك ميك اب و ضروري تنظيف البشرة بعد المزيل والافضل استخدمي جهاز تنظيف.
-خصصي يومين بالأسبوع عناية لبشرتك مثل تقشير و ماسك.
-البخار فوائدة بتكلم فيها في تدوينة مفيد للبشرة استخدميه مرا كل شهر.
-الماء مهم وسر لنظارة البشرة حاولي تشربي على الاقل 8 كاسات في اليوم.





انتهى , اتمنى يكون الموضوع مفيد احبكم♥